चाकण एमआयडीसीतील खड्ड्याला दुग्धाभिषेक करून पूजा; प्रशासनाच्या दुर्लक्षाचा अनोख्या पद्धतीने निषेध

रोखठोक मराठी न्यूज

चाकण : चाकण एमआयडीसी परिसरातील रस्त्यांची दुरवस्था, मोठमोठे खड्डे आणि अपुऱ्या पायाभूत सुविधांकडे प्रशासनाचे लक्ष वेधण्यासाठी उपोषणकर्त्यांनी अनोख्या पद्धतीने आंदोलन केले. प्रशासनाच्या दुर्लक्षाचा निषेध म्हणून एमआयडीसीतील रस्त्यावरील एका मोठ्या खड्ड्याला प्रतीकात्मकरीत्या ‘देव’ मानून त्याला दुग्धभिषेक करून पूजा करण्यात आली. खड्ड्याला हळदी-कुंकू वाहून अभिषेक करण्यात आला. रस्त्यांची अवस्था प्रशासनाने गांभीर्याने घ्यावी, प्रशासनाचे लक्ष वेधण्यासाठी हा अनोखा निषेध करण्यात आला.

या आंदोलनात उद्योजकांसह तीर्थक्षेत्र देहू, भामचंद्र डोंगर आणि भंडारा डोंगर परिसरातील वारकरी संप्रदायातील नागरिकांनीही मोठ्या संख्येने सहभाग घेतला. वारकऱ्यांनी हरिनामाचा गजर करत उपोषणाला पाठिंबा दिला. त्यामुळे आंदोलनाला सामाजिक आणि धार्मिक स्वरूप प्राप्त झाले.

एमआयडीसीतील रस्त्यांची दयनीय अवस्था चाकण एमआयडीसी हा औद्योगिकदृष्ट्या महत्त्वाचा परिसर असून, दररोज हजारो कामगार आणि वाहनांची येथे वर्दळ असते. मात्र, एमआयडीसीतील अनेक रस्त्यांवर मोठमोठे खड्डे पडले असून, रस्त्यांची अवस्था अत्यंत दयनीय झाली आहे. खड्ड्यांमुळे वाहनांचे नुकसान होण्याबरोबरच अपघातांचा धोका वाढला आहे. त्यामुळे कामगार, उद्योजक, वाहनचालक आणि स्थानिक नागरिकांना मोठ्या त्रासाला सामोरे जावे लागत आहे.

मूलभूत सुविधांचा अभाव उद्योगांसाठी आवश्यक असलेल्या मूलभूत सुविधांचा अभाव असल्याची तक्रार उद्योजकांनी केली आहे. पाणीपुरवठा, वीज आणि दर्जेदार रस्ते यांसारख्या सुविधांकडे प्रशासनाने गांभीर्याने लक्ष देण्याची गरज आहे. सार्वजनिक मालमत्तेची होणारी हानी आणि अपघातांचे वाढते प्रमाण लक्षात घेता रस्त्यांची तातडीने दुरुस्ती करावी, अशी मागणी आंदोलनकर्त्यांनी केली.

गणेश बोत्रे पाटील यांची भूमिका स्पष्ट: या उपोषणाचे नेतृत्व करणारे जिल्हा परिषद सदस्य गणेश बोत्रे पाटील यांनी सांगितले की, “चाकण एमआयडीसी हे औद्योगिक विकासाचे महत्त्वाचे केंद्र आहे. मात्र, येथील रस्त्यांची अवस्था अत्यंत बिकट झाली आहे. रस्त्यांवरील खड्ड्यांमुळे वाहनांचे नुकसान होत असून, अपघातांचाही धोका वाढला आहे. उद्योगांना आवश्यक असलेल्या मूलभूत सुविधा उपलब्ध करून देणे ही प्रशासनाची जबाबदारी आहे.”“उद्योगांना चालना देण्यासाठी चांगल्या पायाभूत सुविधा आवश्यक आहेत. रस्ते दुरुस्त झाले नाहीत, तर उद्योगांचे कामकाज सुरळीत कसे चालणार? प्रशासनाने उद्योजक आणि नागरिकांच्या समस्यांकडे गांभीर्याने लक्ष देऊन तातडीने उपाययोजना कराव्यात,” अशी मागणी त्यांनी केली.

आंदोलन तीव्र करण्याचा इशारा:- चाकण एमआयडीसीतील रस्ते आणि पायाभूत सुविधांच्या प्रश्नावर प्रशासनाने तातडीने निर्णय घ्यावा, अशी मागणी आंदोलनकर्त्यांनी केली आहे. मागण्या मान्य न झाल्यास आगामी काळात आंदोलन अधिक तीव्र करण्याचा इशाराही देण्यात आला आहे.खड्ड्याची पूजा करून करण्यात आलेल्या या अनोख्या आंदोलनामुळे चाकण एमआयडीसीतील रस्त्यांची दुरवस्था आणि पायाभूत सुविधांचा प्रश्न पुन्हा एकदा चर्चेत आला आहे. आता प्रशासन या मागण्यांची कितपत दखल घेते आणि प्रत्यक्षात कोणत्या उपाययोजना करते, याकडे उद्योजक व नागरिकांचे लक्ष लागले आहे.